Bruchd d Gmeind en Sportkoordinator?

Für d Wettiger Politik esch die Woche e bsunderi Woche! Morn esch scho die zwöit Iiwohnerratsitzig. Det dörfd bsunders de Aatrag uf d Schaffig vo de Sportkoordinatorestell für Diskussione sorge.

Am Mentig, 22. Juni 2020 hed de Iiwohnerrat drü Stund im neue Tägisaal taged. De Rächeschaftsbricht und d Rechnung 2019 sind die Haupttraktande gsi und d Diskussion über d Rächnig het Züg vonere Budgetdiskussion ahgnoh.

Morn Donschtig de 25. Juni, dörfd d Sportkoordinatorestell zu de gröschte Diskussione führe. Esch de Projektierigskredit für e Sanierig vomene Abschnitt vo de Tägerhardstross quasi unbestritte, het d Finanzkommission d Stell vom Sportkoordinator mehrheitlich abglehnd. Das die Stell sinnvoll wär, wil die verschednige Zueständigkeite s aktuelli System kompliziert mached und en Ehreamtliche veel Ziit muess investiere, damit d Verein die Turnhalle chönnd nutze, esch unbestritte. D Frog esch eher, ob es 50% müend sie und ob d Gmeind die Stell ned au mit interne Verschiebige chönnd schaffe, ohni zusätzlichi Stelleprozent. Die i de soziale Medie und im Badener Tagblatt ufgstellti Behauptig, en 25-jährige würd be de Gmeind ufere settige Stell bieme 50%-Pensum 50’000.- Franke verdiene esch aber Fake News. Im Ahtrag a de Iiwohnerrot wird zwar es Mindestalter vo 25 gnennt und für de Lohn es Budget vo 50’000.- beahtreit, aber s Budget müesst au für en ältere Arbeitnehmer lange. Uf Rückfrog bi de Gmeind het de Gmeindschriiber für en 25-jährige en Lohn vo öppe 44’000.- gnennt. .. es dörft also intressant werde! Au am Donnschtig send Zueschauer im Tägisaal erlaubt .. send’s am Mändig zo de besten Ziite grad mol 9 Persone gsi wo sech für’s politische Wettige intressiert händ!