Es isch kaum z glaube. Trotz absolutem Füürverbot im Wald und am Waldrand, hend Lüt miteme Einweggrill en Wurzelstock in Brand gsetzt.
Wil d Trocheheit d Böde uströchned het, gilt im Kanton Aargau d Gfahrestuefe 4 vo 5 in Sache Waldbrandgfahr. S Füüre am und im Wald isch verbote! S het au scho zwöimol a de Lägere brönnd, was eigentli Warnig gnueg set si. Aber zwüsche Schwümmbadstross u de Limmig hends Lüt fertig brochd, ned numme miteme Einweggrill z brötele, sondern ihn au achtlos im Wald z entsorge. Dodemit hend si en Wurzelstock in Brand gsetzt, wi d Füürwehr uf ihre Website mitteild. Spaziergänger hend s Füür gseh und so isch am Mittwoch, 22. April 2020 churz vor de Halbisibni am Abe d Füürwehr alarmiert worde, wo s Füür zum Glück schnell het chönne lösche.