Dass es bi de Poschtstelle z Wettige zu grosse Änderige wird cho, isch scho länger bekand. Jetzt het d Post Details bekannt geh.
Alli drü Wettiger Post-Filiale werded früher oder später gschlosse werde. Das heisst aber ned, dass me z Wettige kei Postaaglägeheite cha erledige. Im Volg werded ab em 1. Januar 2020 Postdienschtleischtige aabote und d Post suecht en Ersatzstandort für ei Poststell. D Umstrukturierig bruuchds, wil alli drü Standört i de letschte Johr Iibuesse bi de Schalterbsüech gha hend.
Im Detail gsehnd d Plän eso us: Ab em 20. Januar 2020 werded im Volg a de Lägerestross 19 Postdienschtleischtige aabote. Wil de Lade uf Johresbeginn vo de Landi Furt- und Limmattal-Gnosseschaft übernoh wird, werded d Öffnigsziite verändered, was für Lüt, wo Postgschäft wend erlige, sich positiv uswirkt. In Zuekunft sell de Lade vo Mentig bis Samschtig vom 6i am Morge bis em 8i am Abe offe si. D Filiale a de Seminarstross, wo bis und mit 17. Januar 2020 normal laufd, wird dann für Privatkunde gschlosse. Für Gschäftskunde wird uf de Rücksiite vom jetzige Gebäud d Möglichkeit gschaffe, Gschäftssendige zu jedere Ziit ufzgeh.
D Filiale a de Staffel- und de Bahnhofstross werded irgendeinisch endgültig gschlosse werde, d Post wot als Ersatz aber e noii Filiale baue. De Standort vo dere noie Filiale isch no offe.
D Gmeind verstoht, dass d Post uf di andere gsellschaftliche Gegebeheite reagiert. Zudem sigs en Usbau und kein Abbau, schuscht het sich d Gmeind degege gwehrt, schriibd s Badener Tagblatt.