Bi de EuroHockey Club Trophy, Men 2019, wo vom Fritig, 7. bis Mentig, 10. Juni 2019 uf de Bernau stattgfunde het, wird Rotwiiss Dritte. De Jubel isch gross gsi.
Nach em verpasste Finaliizug, het s Herre-Team vo Rotwiiss schnell wider zruck gfunde zum Erfolg. Wobi, gfehlt het der ja nöd würkli. Erfolriich isch nämli s ganze Turniir gsi, bi dem vo de Organisation her fascht alles gschtumme het und wo di eiged Mannschaft d Erwartige klar erreichd, ja übertroffe het. Durch einigi Abgäng isch s Team zu Saisonbeginn dütlich verjüngt worde, so dass vilne Spiler di international Erfahrig uf dem höche Niveau vor em Turniir no gfehlt gha het. Davo isch aber wenig z gschpüre gsi. Bim letschte Gruppematch hend di Rotwiisse numme um Sekunde de Finaliizug verpassd und dann im Spil um Platz 3 am Pfingschtmentig alles geh.
De Match gege di ukrainisch Mannschaft HC OKS-SHVSM Vinnitsa isch lang usgliche gsi. S erschti Virtel isch mit eme 0-0 z Änd gange und de Füehrigträffer vo Rotwiiss in de 29. Minute hend d Ukrainer kurz druf chönne usgliiche. Di meischte Goal sind im dritte Virtel gfalle, wo Wettige i de 31. und 34. Minute en schöne Vorschprung het chönne usespile, bevor Vinnitsa i de 35. Minute wider de Aaschluss gfunde het. Es virts Goal hets i de 40. Minute geh, so dass Wettige mit eme 4-2 in di letscht (kurz) Pause het chönne goh. D Heimmannschaft het de Match guet unter Kontrolle gha und de Aaschlussträffer vo de Ukrainer i de 60. Minute isch z spot gfalle, um s Spil no z kehre. Sogar mit Pyro isch de Siig gfiired worde.
S Turniir gunne het übrigens Cardiff & Met, wo gege d Wiisrusse us Brest miteme 4-3 chnapp d Oberhand bhalte het.