Rotwiiss hat nachere super Gruppephase nume ganz chnapp de Final vo de EuroHockey Club Trophy, Men 2019 verpassd. Morn gohts um de 3. Platz.
Es isch en dramatisch Match gsi, wo de Zueschauerinne und Zueschauer hüt, Sunntig, 9. Juni 2019 uf de Bernau bote worde isch. De Gegner us Brest in Wiissrussland het nebem Unentschide gehe Glennane (IRL) gege Casa Pia Atlético Clube (POR) überzüügend gunne gha. So sind d Vorussetzige für das jungi Wettiger Team nöd schlächt gsi. Es Unentschide hetti nach de Siig i de erschte beide Match für de Finaliizug glanged.
De Start isch guet und engagiird gsi, d Wiisrusse aber athletischer und mit meh internationaler Erfahrig. Relativ früeh im 2. Viirtel, i de 19. Minute sind d Wettiger in Rückstand grote, hend aber nie ufgeh. Das het sich kurz vor em Schluss vom Match uszahld. In de 58. Minute het de Florian Feller s 1-1 chönne schüsse. Mit eim Fuess hend di Rotwiisse scho im Final gschtande, wo d Schiri bim allerletschte Aagriff es Foul pfiffe und uf e kurzi Egge entschide hend. (Video vo de Schlussphase) D Spilziit uf de Stadion-Uhr het i dem Momänt scho uf 0:00 gschtande. Aber wi es im Hockey eso isch: d Strofegge wird no gschpild. De erschti Schuss hend Wettiger no chönne abwehre, de Nachschuss isch dann im Netz glanded.
Di emotional ufribendi Schlussphase mit em truurige Änd für Rotwiiss, cha aber ned drüber hinwegtüüsche, dass di jung Mannschaft e super Turniir gschpild het und morn, bim Match um de dritti Platz viil Zueschauerunterstütztig verdient het.