D Tagesstrukture «Tagesstern» am Schuelstandort Alteburg platzed us allne Nöht. Di reformiert Chile Wettige-Noiehof stelld us dem Grund ab em noie Schueljohr Rüüm im Chilegmeindhuus Wettige zur Verfüegig und muess dodefür enger zämmerucke.
Im Schuelchreis Alteburg wachsed d Schüelerzahle. Dodevo sind au d Tagesstrukture betroffe, wo im Uftrag vo de Gmeind Wettige durch d kidéal ag unter em Label «Tagesstern» betribe werded. Wil de aktuell Standort im Schulchreis ned cha usbaud werde und somit kei Platz für witeri Chind würd ha, isch nach Lösigegsuechd worde. Wege de Nöchi zu de Schuelaalag und wil scho früehner en Mittagstisch im Chilegmeindhuus unterbrochd gsi isch, het d Gmeind d Chilepfläg aagfröged, ob d Tagesstrukture nöd im Chilegmeindhuus chönnd Platz finde.
Au wenn d Chilegmeindhuus über grosszügigi Rüümlichkeite verfüegd, wo nöd alli gliich entensiv bruuchd werde, het sich zeiged, dass en Iiquartiirig vom «Tagesstern» nöd ganz eifach isch. Vili Gruppene, wo d Rüümlichkeite teilwiis sit Jahrzehnt bruuche, müend uf anderi Rüüm uswiche, teilwiis au ins Chilegmeindhuus Noiehof. D Chilepfläg, d Schuel Wettige und au de «Tagesstern» froied sich aber, dass d Verhandlige zumene guete Ergäbnis gführd hend und für de Tagesstärn e passendi Lösig gfunde worde isch. Zu de Betroiigszite vom «Tagessterns» wird es im Chilegmeindhuus scho bald lebhafter zue und her goh.