D Regionalpolizei (Repol) Wettige-Limmattal sind in de letschte Täg in de Schlagziile gsi. D Gmeindammanne vo de Vertragsgmeinde lobed s Polizeikorps.
Mit Vorwürf vo ehemolige Polizischte gegenüber Vorgsetzte het e Zitig us de Region i de letschte Täg Schlagzile produziird. Geschter isch en Vorgsetzte vom Bezirksgricht Bade frei gschproche worde. Er het sich gege en Strofbefehl vo de Staatsaawaltschaft gwehrt gha.
D Gmeindammanne vom Vertragsgebiet vo de Regionalpolizei Wettige-Limmattal hend sich jetzt inere Mediemitteilig Stellig gnoh. Si lobed di vorbildlich Dienschtleischitge vo de Mitarbeitende vom Polizeikorps. D Repol, wo in de Zwüscheziit 38 Mitarbeitendi het, sig für di öffentlich Sicherheit, Rueh und Ordnig z Wettige, z Noiehof, z Würelos, z Killwange, z Schpreitebach und z Bergdietike zueständig und stelled de Korpsfüehrig und de Gruppeleitende es guets Züügnis us. S Kader würdi in Füehrigsfroge ständig witerbild. D Kennzahle us em Polizeiumfäld, wi Präsenz und Verhaftige zeiged de Erfolg vo de Repol. S Iisatzmodell isch beliebd und zur Ziit gäbs kei personelli Vakanz. D Gmeindammanne betoned au, dass sowohl de Leitigsusschuss vo de Repo, wo us Gmeindröt zämmegsetzt isch, wi au d Finanz- und d Gschäftsprüefigskommission vo de Gmeind Wettige und au d BDO bi Evaluiirige d Repol guet bis sehr guet beurteild hend.
Zum Schluss wird in de Mediemitteilig betond, dass us Gründ vom Schutz vo de Persönlichkeit kei interni Personalaaglägeheite nach usse kommuniziird werded.