Grad isch d Karin Suter-Erath bi de Sportlerehrig vo de Gmeind uszeichned worde und scho het si di nächschte Titel gunne. Am Wochenänd isch si Schwiizermeischteri worde.
Z Nottwil hend am Wochenänd vom 26./27. Jänner 2019 d Schwiizermeischterschafte im Rollstuehl-Badminton stattgfunde. Doderbi het d Karin Suter zwöimol Gold gunne. De erschti Titel, wo si au im Vorjohr gunne gha het, hets im Einzel geh. di zwöit Schwiizermeischterschaft a dem Wochenänd het si im Mexed Doppel zämme mit em Christian Hamböck für scih chönne entschiede. Nach drü Sätz (21-16 19-21 21-17) isch de Siig gege d Cynthia Mathez und de Luca Olgia perfekt gsi.