Au das Johr wird mer a diverse Ort chönne go Christbäum chaufe.
Traditionell esch d KAB uf em Rathuusplatz be de grosse Tanne z’treffe. Det send Nordmanntanne, Blautanne und au die klassischi Rottanne im Aagebot.
Die Bäum chömmed all us de nöchere Region, send also ned med Lastwage, eng a eng zämebunde vo wittewegg uf Wettige brocht worde.
2/3 vom Reinerlös wird gspendet an d Stiftig für Menschen mit Beeinträchtigung (arwo), dem KAB Hilfswerk „Brücke Le pont“ und wittere Institutionen.
Göffnet vom Donschtig 13.Dezember bis am Samschtig 22.Dezember
Mändig bis Fritig 9.00-12.00Uhr, MittagsPause, 13.30-18.30Uhr
Samschtig 8.30-17.00Uhr
En wittere Christbaum-Verchauf wo be Gross und Chlii sehr gschätzt und gliebt wird, esch de von de Famile Benz uf em Ziegelhof a de Landstross 227.
De findet das Johr am Samschtig 15. Dezember statt… Uf em Ziegelhof findet mer nebe de Christbäum au no e beheizti Festbeiz, feini Köstlichkeite vom Grill, e Wiehnachtszauber-Bar, e Hüpfburg, en Chlii-Tierzoo und es Ponyritte für d Chend…. Das ganze findet ab 10.00 Uhr bis ca. 18.00 Uhr statt.
Natürlich cha mer au a de andere Täg uf em Ziegelhof go Christbäum chaufe =;O)
Nebe dene zwoine Ort get’s natürlich au Möglichkeite uf em Lüscherhof a de untere Geisswiesstross direkt ab Hoflade go Christbäum go chaufe oder a de Schartestross, nebem Pfarreiheim, au direkt vom Hof vo de Fam. Huser, be de Migros a de Landstross, bem Coop im Tägipark, uf em Zentrumsplatz, und und und…..
Uf jede Fall veel Vergnüge bem Ussueche vom schönste Christbaum oder de wo denn sii söll=;O)