Wer für en Artikel Schlagziile suechd, muess mengisch d Fantasii bemühe, um e «knackigi» Überschrift z finde, wo zum Aaklicke animirt. Ganz anderscht isch es geschter im Iiwohnerrot gsi. Me chönnd locker zwanzig Artikel mit guete Schlagziile versehe.
«Fiko erliided Schiffbruch»
D Finanzkommission (Fiko) het geschter, 18. Oktober 2018 bi de Budgetberatig en schwere Stand gha. Sowohl de Aatrag gege d Erhöchig vo de Stelleprozänt für d Schuelsozialarbet (SSA) wi au der für en (zmindescht vorläufige) Verzicht uf en Aateil anere Integrationsstell het im Rot kei Mehrheit gfunde.
«D SVP wirft em Gmeindrot Tüschigsmanöver vor»
D SVP het scho grad am Aafang klar gmachd, dass si s Budget wird ablehne, will de Gmeindrot de Iiwohnerrot und d Bevölkerig in drü Beriich wot tüüsche. Bi de Sondereffekt, mit versteckte Stüürerhöchige und durch di fehlend Verzichtsplanig.
«Durch en SVP-Aatrag git d Gmeind im 2019 meh Gäld us, wi vom Gmeindrot vorgseh»
Trotz de Kritik am Voraaschlag het de Roger Scherer für d Fraktion 35’000 Franke für d Durchfüehrig vomene Seniorenamittag beaatrait, wo im Rot e Mehrheit gfunde het. Das het zuere Erhöchig vom Budgetkredit vo 2150.- Franke gführt, gegenüber em Vorschlag vom Gmeindrot. E Situation wo es z Wettige schints no nie geh het.
«Führd e höcheri Dividende vom EWW zuere Erhöchig vom Strom-Priis?»
Entlaschtig fürs Budget ergit sich durch e höcheri Dividende, wos EW an de Aktionär cha usschüte. Statt de budgetiirte 300’000.- Franke überchund d Gmeind 400’000.-. D Frog, warum s EW gliichzitig d Strompriis erhöht, cha de Verwaltigsrotspräsident nöd zur Befridigung vo allne Iiwohnerröt schlüssig begründe.
«Chunnd di nächscht Stüürerhöchig scho im 2020?»
De Aatrag vo de SP für de Schuldeabbau scho jetzt d Stüüre z erhöche het im Rot kei Merhheit gfunde. Bi de Berotig vom Finanzplan lad aber de Fiko-Präsident de Gmeindrot ii z prüefe, ob en Erhöchig scho für 2020 möglich isch.
«Het Wettige en linke Gmeindrot?»
De Orun Palit vo de glp sprichd bi sim Votum zum Finanzplan vo «linke Element», wo dete z finde siged. Bi eme klar bürgerliche Gmeindrot mit zwöi CVP- und zwöi FDP-Verträter wunderd ihn das.
«D Kreditabrechnig zu little Wettige wird zum zwöite Mol abglehnt»
Isch d Rückwiisig vom Kreditaatrag uf Aatrag vo de Fiko scho bim erschte Mol es Novum gsi, het d Vorlag au dismol kei Chance gha. Obwohl d Fiko en Aanahm empfohle het und de Gmeindamme betond het, dass s Gäld usgeh sig und sich nüd am Sachverhalt laht lah ändere, isch d Kreidtabrechnig bi 14 Ja-, 21 Nei-Stimme und 8 Enthaltige abglehnt worde. Jetzt muess schints de Regiirigsrot über d Kreditabrechnig entscheide.
Wieri Gschäft sind d Überwisig von ere Motion, eine vomene Poschtulat und d Beantwortig vonere Interpallation gsi. Nach ere fascht 6-stündige Sitzig het de Iiwohnerrotspräsident di bemerkenswert Sitzig chönne schlüsse.