De Uufall vomene Armeefahrzüüg z Brämgarte het au en Iisatz vo de Wettiger Füürwehr usglöst. D Ölwehr isch uf de Rüüs im Iisatz gsi.
Am Mentig, 17. September 2018 isch bi Brämgarte en Kran vo de Schwiizer Armee in d Rüüs gheit. Wil d Wettiger Füürwehr im Oschtaargau d Stützpunktfüürwehr für Öl isch, isch d Ölwehr zum Iisatz cho, damit d Umwält nöd z Schade chunnt. Am Memtig hend d Füürwehrlüt unterhalb vom Unglücksort e Ölsperri iibaut und no eini bi Gäbischtorf amene für settigi Fäll vorbereitet Ort. Am Tsischtig isch d Ölwehr dann no einisch im Iisatz gsi und het di Sperre wider usbaud.