Abstimmige uf Gmeinds- und Kantonsebeni gits am Sunntig nöd. Di beide eidgnössische Vorlage hends aber in sich.
Au wenn kei Wettiger Thema zur Abstimmig chunnd, isch es us oisere Sicht wichtig, an de Abstimmig am Sunntig teilzneh. Sowohl d Vollgäldinitiative wi au s Gäldspilgsetz chönnd witreichende Uswirkige ha.
Wer dörf Gäld «herstelle»? Numme d Nationalbank oder – wi bisher – au d Gschäftsbanke? Wer dörf Glücksspiil im Internet aabüte? Numme in de Schwiiz lizenziirti Casinos? Und sell me di andere durch Netzsperre vom Märt färnhalte.
D Folge chönnd witreichend si und vor allem d Vorlag vo de Vollgäldinitiative isch komplex. Das set eine aber nöd davo abschrecke, sich e Meinig z bilde und abzstimme.
Für Briifwahl isch es scho z spot. D Abstimmigscouvert müend bis spöteschtens am Sunntig am Morge in de Briefchaschte vom Rothuus iigworfe oder am Sunntig zwüsche 9 und 10 im Rothuus in d Urne grührt werde.