Überchund en Wettiger de «Special Award Leistungssport»?

Drü Funktionär, zwöi Manner und e Frau, sind für de «Special Award Leistungssport» nominiert worde, wo erscht zum zwöite Mol vergeh wird. Mit derbi isch de Kudi Müller.

De Kudi Müller isch en Allrounder bim Landhockey, schriibd Aargauer Sport uf sinere Website. Vo 1980 bis 1991 isch er Nationalspiler gsi und het 28 Länderdpil bestrite. Wo er Trainer gsi isch, sind au d Titel ned wit gsi. Menge Meistertitel und Turniersig hend vo ihm trainiirti Teams gunne, glich ob Juniore, Dame oder Herre und das bi verschidnige Verei. Bi Rotwyss het er unter anderem d Junioreabteilig gleitet und isch au Sportchef gsi. Zletscht isch er Team-Manager vo de Herre vo Rotwyss gsi. Au im nationale Verband Swisshockey het er sich engagiird. Als Chef Leistigssport, als Team Manager vo de Manner-Nationalmannschaft und als Chef de Mission.

Für das Engagement isch er jetzt für de «Special Award Leistungssport» nominiird worde, wo vo de Vereinigung Aargauer Sportjournalisten (VASJ) im Zammenarbet mit de IG Sport Aargau und de Sektion Sport vom Kanton Aargau lanciird worde isch. D Wahl, an dere alli Mitglieder vom VASJ und de IG Sport Aargau stimberechtiged sind, laufd bis Ändi Dezember. Si hend d Hälfti vo de Stimmchraft. Di anderi Hälfti het es Wahlgremium mit zwöi Vertreter vom VASJ, de IG Sport Aargau und de Sektion Sport vom Kanton. De Gwünner wird im Jänner i d AZ-Sonderbilag zu de Aargauer Sport-Gala portraitiird. De Preis wird a de Sport-Gala vom 6. März 2030 überreicht.

Mir vo de Wettiger Nochrichte wünsched em Kudi vil Erfolg!