Wettige esch im Grosse Rat z Aarau bis letschti Woche mit siebe Persone verträte gsi. Wil de Nochrücker für d Lilian Studer ebefalls vo Wettige isch, sind es ab morn, Tsischtig, 19. November 2019 wider siebe.
Zwischem Rücktritt vomene Mitglied vom Grosse Rat bis zur Inpflichtnahm vom Nachfolger gohts jewils mindescht e Woche. So esch es au bi de Nachfolg vo de Wettiger EVP-Grossrätin Lilian Studer, wo wege de Wahl i de Nationalrat letschte Tsischtig ihre Rücktritt erklärt het. Ihr Nachfolger, de Lutz Fischer-Lamprecht wird morn im Grossratssaal z Aarau in Pflicht gnoh, teild de Kanton mit.
De Lutz Fischer-Lamprecht esch reformierte Pfarrer, Iiwohnerrat und Noch-GPK-Präsident vo de Iiwohnergmeind. Zudem esch er eine vo de beide Redaktore vo de Wettiger Nochrichte.