Us Wettige kandidiered 35 Lüt für de Nationalrot und d Yvonne Feri für de Regiirigsrot. Für de Ständerot kandidiird niemed us Wettige, dodefür sind 4 vo de 10 offiziell Kandidierende us Ännetwettige.
Wil Briefwahlcouverts per B-Post verschickt werded, isch es für d Stimmabgab bi de Post z spot. Aber me cha am Sunntig, 20. Oktober 2019 a d Urne oder s Wahlcouvert im Rothuus iiwerfe. Aber wi werded d Wahle usgoh und mit wivil Vertreter us Wettige chönned mir rechne?
Nationalrot
A de Widerwahl vo de Yvonne Feri i de Nationalrot gits eigetli kei Zwiifel. Vor viir Johr het sis bescht Ergäbnis vo de Aargauer SPler gah und durch d Kandidatur für de Regiirigsrot het si vil Ufmerksamkeit i de Wahlberichterstattig übecho und sich bi vilne Wahlpodie chönne präsentiire. Wenn si i de Regiirigsrot gwält wird (lueg witer unte), dann isch ned z erwarte, dass d Nochfolg durch öppe us Wettige erfolged.
Di beschte Chance für Wettige es zwöits Nationalrotsmandat z erobere, het wohl d Lilian Studer. Uf de EVP-Hauptlischte isch si d Spitzekandidatin. Für en EVP-Sitz müend zwöi Bedingige erfüllt si: D EVP muess meh Stimme ha, wi d BDP, mit dere si e Lischteverbindig het und zämme müend si knapp 6% Wähleraateil ha. Beides schint nach Wahlumfrage in mögli bis wahrschinlich.
En dritte Wettiger Nationalrotssitz isch ned wahrschinlich, aber mir halted ihn für mögli. Und zwar für d Michaela Huser. Si stoht uf de SVP-Lischte uf Platz 14, was bi bisher 7 SVP-Sitz ehnder ussichtslos schint, aber si het scho bi de Grossratswahl zeiged, dass si vili Plätz cha guet mache. Damals isch si vom 21. Lischteplatz us i de Grosse Rot cho und het im Bezirk s siebtbescht Ergäbnis gha.
Ständerot
Bi de Wahle für de Ständerot wird kein Wettiger Sitz geh. D Yvonne Feri het di SP-intern Nomination gege de Cedric Wermuth im September 2018 verlore und schuscht isch niemed im Renne um en Sitz gsi. Wi obe erwähnt, sind aber viir vo de acht aagmeldede Kandidatinne und Kandidate (im erschte Wahlgang cha me jede Stimmberechtigte wähle) us Ännetbade. Und mit em Thierry Burkart wirds wohl mindeschtens ein Ännetbadener Ständerot geh.
Regiirigsrot
Bi de Ersatzwahl für de Ständerot isch d Yvonne Feri im Renne, wo bi de letschte Gsamternoierigswahle gege d Franziska Roth de kürzer zoge het. Lut Umfroge wird es en zwöite Wahlgang geh, bi dem alles devo abhängt, wer wider wird aaträte. Da waged mir kei Prognose.
Aber wen au immer ihr unterstützed: Gönnd goh Wähle! Demokratie läbt vo de Beteiligung!!
Übrigens wird am Sunntig ned numme gwählt, sondern es git au en Abstimmig: De Iiwohnerrot het es Kreditbegehre vo Fr. 4’940’000.00 a de Baukoschte für d Sanierig und d Erwiterig vom Kurtheatrer Ännetwettige gschproche, wo em obligatorische Referendum unterstoht.