Mit de chürzere Täg und de früeche Dunkelheit stigd im Herbscht d Gfahr vo Iibrüch. D Kantonspolizei Aargau hät scho di erschte Dämmerigs-Iibrüch verzeichned. D Täter nutzed d Ziit, wenn mir uf em Heiwäg vom Schaffe sind, zum unbemerkt in d’Hüser inezcho.
Es hät scho di erschte Iibrüch geh: Am 1. Oktober 2025 am halbi nüüni am Abig isch z Brugg in e Wohnig iibroche worde. D Bewohnerin hät d Täter in de Stube überrascht. Sie send dur es Fänschter devo. D Iibrächer händ en Glasschniider brucht, zum de Griff vo usse z erreiche. De materiell Schade isch oft chliiner wie s Gfühl vo de Verunsicherig und de Verletzig vo de Privatsphäre.
Will d Erfahrig zeiged, dass d Zahle spöteschtens mit de Umstellig uf d Normalziit (MEZ) stiiged, verstärkt d Kantonspolizei Aargau mit de Regionalpolizei ihre Isatz. Sie werded no meh präsent si und gezielt Kontrolle und Fahndige durefüehre.
4 Tipps gege Iibrüch:
– Bruched e Ziitschaltuhr oder Smart-Home-System, damit s’Liecht am Abig automatisch a und us gohd. Dann schiint es eso, dass öpper dihei isch.
– Au wenn me numme churz wäg isch: D Huus- und Terrassetüre und d Fänschter immer schlüsse. Offeni oder nume zuezogni Fänschter sind en Iiladig. Mechanischi Zusatzsicherige chönd hälfe.
– Kei Leiter, Spate, oder anderi Wärchzüg dusse lo. Die bruched d Täter, zum Fänschter ufheble.
– We im Quartier verdächtigi Persone oder Autos unterwegs sind: Sofort bim Polizeinoutruef 117 aalüte. Jede Hiwiis und jedi Sekunde zählt für d Fahndig.
Bi Froge zu de Schwächstelle vom Huus: D Beratigsstell vo de Kapo hilfd gärn:
https://www.ag.ch/de/themen/sicherheit/kantonspolizei/praevention