Für d Wahle vom Gmeindamme hend mir allne drü Kandidate di gliche Froge gstellt. Do sind d Antworte vom Orun Palit (GLP).
WN: S Oberstuefezentrum wird tüürer, wi ursprünglich planed. Wie stohsch du zum Masterplan Schuel?
Orun Palit: Die vergangeni verfehlti Schulraumplanung vom Gmeindrot het mit em Masterplan Schuel ufzeigt, dass mir meh Schulraum bruuched. Ja zum Masterplan Schuel, aber S’Oberstufezentrum nöd zu dene neue Prise vo 140 bis 150 Mio. Fr. Das Preisschild muess tüüfer si.
WN: De Bevölkerigsdruck im Limmattal isch höch und d Miete stiiged. Ohni zuesätzliche Wohnruum würdi d Nachfrag no mehr stiige, gliichzitig isch d Inneverdichtig ned sehr populär. Wo positioniersch du dich in dem Spannigsfeld?
Orun Palit: Punktuelli verdichte ja, und zwar entlang de ganze Landstross, aber chei Hochhüüser vo 53m Höchi am Wy-Chreisel, wie das vom Gmeindrot planet isch. In de Quartier sött e hochi Grüenziffer igfuehrt werde, so dass döt nöd so verdichtet gbaut werde cha. Am Ort vom EW-Lädeli – die Parzelle gehört dr Gemeind – würd ich günstigi, moderni Alterswohnige baue. Villi älteri Lüüt in Wettingen wohned no in ihrne Eifamiliehüüser. Wenn die usziehnd würdet, chönnte mer astell vo dene Eifamiliehüüser neui, mehrstöckigi Wohnige baue und so s’Angebot a Wohnruum erhöche.
WN: Wettige het höchi Schulde, aber es stönd witeri Investitone aa. Welli Lösige gesehsch du, damit d Schulde ned vo de nächscht Generation müend zahlt werde?
Orun Palit: Schulde sind per se nöd öppis schlechts. Jedi Firma schaffed mit Fremdkapital und villi Haushält händ Schulde (Hypothek, Leasing, Kreditkarte, usw.). Mir in Wettingen händ viel Eigekapital (Schuele, s’Rathuus, Turnhallene, usw.), das stoht gegenüber vo unserne Schulde. Dazu häm mer no ca. 70 Mio. Fr. Eigekapitalreservene bi de Energie Wettige. Wo mer aber meh Ufmerksamkeit lege söted, isch uf d’Netto-Zinslast vo dene Schulde. Die isch zur Zyt ca. 1.4 Mio. Fr. höch, und wenn d’Schulde uf 200 Mio. Fr. stieget, wird Zinslast öppe 3-4 Mio. Fr. hoch si. Mir händ zum Glück e Tüüfzinsphase. Mir chönnt Schulde jetzt umstrukturiere und neui Schulde zu tüüfere Zinse aufneh. Als Alageberater bin ich jetzt scho im Kontakt mit Alagespezialiste, um möglichst die Zinschöschte binere Ufnahm vo 100 Mio. Fr. erheblich z’reduziere z’chönne. Ich bin de Meinig, dass s’Hochwasserprojekt und s’Oberstufezentrum zwei Projäkt sind, wo für villi Generatione wichtig isch. Drum sött en Teil vo de Schulde au vo de nächschte Generation treit werde. Vill wichtiger als d’Schulde z’reduziere isch dass Wettige nach negative Rechnige in 2023, 2024 und wahrschinlich in 2025, s’Huhaltsglichgwicht wieder ins Lot bringt. Defür müem mer öppe 4 – 5 Mio. Fr. ab hüt und füer die nächste Johr ispare. Ich bin gege a Stüerfuesserhöhig i de nächste Johr.
WN: In eim Satz: Warum set me usgrächnet dich als Amme wähle?
Orun Palit: Mich set mer as Ammann wähle, will i als promovierte Ökonom i de Finanzwirtschaft, als früehnerer Unternehmensberater und mit mine 12 Johr Erfahrig im Einwohnerrot, en guete Rucksack mitbringe, also Know-how in Finanze, Strategie und Politik ha, wo d’Gmeind jetzt dringend nötig hät.