Es chunnd vor, aber ned so hüüfig: Bi de SVP rückt öpper in de Iiwohnerrot noche, wo ned uf de Wahllischte gstande het.
Mit em Rücktritt vom Daniel Notter us em Iiwohnerrot, het d SVP en vakante Sitz z besetze gha. Dodefür isch, wie bi jedem Rücktritt, de nächscht Kandidat de Nochrücker, wo s beschti Ergäbnis vo de ned Gwählte het. Wenn de ned wot, isch de nächschti uf de Lischte dra. Je nach dem, wieviel Lüt e Partei uf de Lischte gha het, wieviel scho nochegrückt sind oder wieviel scho abgsaid hend, cha es passiere, dass e Partei es Aarecht uf en Sitz het, aber niemed meh uf de Lischte isch, wo chönnd nocherücke. Dann muess me uf d Suechi. So isch es de SVP gange. Am Donnschtig, 15. Mai 2025 wird de Fritz Zanzerl im Iiwohnerrot im Pflicht gnoh, wo bi de Wahle im Herbst 2021 ned uf de Iiwohnerrotsliste vo de SVP gsi isch. Politisch Interessierte isch er aber ned ganz unbekannt. Letscht Johr isch er uf de SVP-Liste für de Grossi Rot gsi.