Wie CH Media inere Mediemitteilig schriibd, übernimmt de Mediekonzern d Gratiszitige «General-Anzeiger» und d «Rundschau». S Regionaljournal und d Wettiger Nochrichte sind dodemit di letschti Medie in de Region, wo ned zu CH Media ghöred.
Per 1. September 2026 chaufd CH Media d Aargauer Gratiszitige «General-Anzeiger», «Rundschau Süd» und «Rundschau Nord» vo de Effingermedie. De Regionalverlag ghört zu de Schelleberg-Gruppe, wo sich künftig uf ihres Druckgschäft wot konzentriere. Us dem Grund het sich d Schelleberg-Gruppe entschide, d Gratisanzeiger an CH Media z verchaufe, wo in de Regione Brugg und Ännetwettige erschiined.
Für CH Media bedüted de Zuechauf e geziilti Ergänzig vom bestehende Anzeiger-Portfolio, schriibd s Medieunternehme. Si bechömmed e stärkeri Marktpoistion im Aazeigegschäft, was au zueme attraktivere Aagebot für d Werbekunde set füehre.
Wil s Regionaljournal Aargau/Soledurn en kantonale Blick uf d Ereignis in de Region Wettige/Ännetwettige het, bliibed mir vo de Wettiger Nochrichte (mit de vo ois betribene Limmattaler Nochrichte) s einzig Medium, wo unabhängig vo CH Media us de Gmeind und de Region brichted.