Vorstöss send eini vo de wichtigschte «Werkzüüg» für Parlamentarier. Sie beschäftiged aber au d Verwaltig und s Parlament und sind ned gratis.…!
Gfüehlt ged’s immer me Vorstöss i de Parlament, zum Teil, wel d Politker uf mediali Ufmerksamkeit hoffed, was quasi Gratiswahlkampf ermögliched, aber selbstverständlich au völlig berechtiged, wel si vo de Regierig Antworte uf wichtigi Frage erwartet oder dur Motione und Postulat es Thema, wo Ihne am Härze lieged, wänd lanciere oder forciere.
Für de Wettiger Iiwohnerrot, für de mer die letschte 10 Johr analysiert händ, esch e Zuenahm a Vorstöss ned klar erkennbar. Die beide «Peeks» vo 38 Vorstöss pro Johr, sind im 2019 und im 2023, aber au im 2017 het es 36 Vorstöss gä. Die tüfschti Zahl isch im 2016 mit 17 gsi.
Gratis sind di Vorstöss nöd und im Grosse Rat vom Kanton Aargau bechund jede Vorstoss be de Beantwortig es «Priisschild». Es entsprechends Postulat, wo d FDP im 2015 iigreicht hed, zom au Vorstöss z Wettige es «Priisschild» z verpasse, esch im 2016 vom Iiwohnerrot abglehnt worde.
Mir händ d Sandra Thut, Gmeindschriiberi und ab em Sommer Geschäftsleiteri vo de Gmeind, gfröged, ob d Gemeind die Koste cha abschätze, wo z Wettige dur die Vorstöss entstönd. „Mer chöne leider ned beziffere, wie vell die durchschnittliche Bearbeitig vomene Vorstoss chostet. Es esch sehr unterschedlich. Dur die klar Meinig vom Iwohnerrot usem 2015, fühered mer au gar kei Statistik zo dem Punkt», esch ihri Antwort gsi. So chönnd au mer die Choschte numme schätze.
Bim Kanton choscht en Vorstoss in de Regel meh wie 1000.- Franke. Au z Wettige dörfti sich benere Vollkosterächnig en ähnliche Betrag ergeh. Dezue chömmed no d Koste, wo d Behandlig im Iiwohenrrot mit sich bringed. So kostet e Sitzig, wie im März 2024, be dere numme Vorstöss behandled wurde sind, bis zu 5000.- Franke Sitzigsgäld, dezue chund d Arbeitsziit vo Lüt us de Verwaltig und Infrastrukturkoste.
Und au wenn me, grad be de einte oder andere Interpellation de Iidruck hed, es Telefon be de Verwaltig hed au gholfe, die Froge z beantworte, esch es natürlich s Rächt vo jedem Parlamentarier, so veel Vorstöss iizreiche, wie er oder si well.