Bi de Iiwohnerrotssitzig vom Donnschtig, 6. März 2025 het de Iiwohnerrot über zwöi Vorstöss müesse entscheide, wo öppis ähnlichs hend welle: de Gmeindamme sell nümm Gmeindamme heisse.
De Begriff «Gmeindamme» füehrt immer weder zu Diskussione. Zum eine, wil de Begriff vo velne als altmodisch empfunde wird, zum andere, will di wiblich Form «Frau Gmeindamme» ned als gschlechtsneutral empfunde wird. D Fraktione SP/WettiGrüen und GLP hend dodezue Motione iigreicht gha, damit de Namenswächsel uf di noi Legislatur cha vollzoge werde. De Gmeindrat isch bereit gsi, die beide Motione als Postulat entgege z neh, wil die Motionär in de Sach zwar s gliiche hend welle, aber di eine vo «Gmeimdspräsident», di anderne vo «Gmeindspräsidium» gschribe hend.
Gege d Überwisig vo de Postulat het sech aber Widerstand gregt. Für d Fraktion Die Mitte-EVP het de Lutz Fischer d Überwisig bestritte, Sympathie für historischi Begriff güsseret und betont, dass au die wiblich Form «Frau Gmeindamme» etabliert sig. Au uf d Debatte im Grosse Rat het er higwise, wie den au in de Gegered d Manuela Ernst vo de GLP. Dete isch im 2022 e Motion mit em Stichentscheid vo de damalige Ratspräsidenti überwiese worde, wo d Verfassig und s Gmeindgsetz so wot aapasse, dass de Gmeindamme kantonswit zum Gemeindpräsident wird.
Ähnlich knapp isch es im Iiwohnerrot gsi, wo 22 Iiwohnerröt für de Wechsel vo de Bezeichnig gstimnt hend und 21 degege. Wil di 7 Iiwohnerrot wo gfehlt hend, mehrheitlich us em bürgerliche Lager si gsi (3 vo de SVP, 2 vo de Mitti und je eini vo FDP und GLP), isch de Wechsel vo Gmeindamme zu Gmeindpräsident no ned sicher und s letschti Wort hetti eh s Volk, wil d Gmeindordnig müesst aapassd werde.