
Uf em Areal zwüsche de Schwimmbadstross und de Alberich Zwyssigstross, wo au s Kunstwerk stoht, wo im Volksmund «Haifischzäh» heisst, wird s Regebecki «Kloster» baut. Di erschte Vorbereitigsarbeite started ab en 7. Februar 2025.
Am 9. März 2023 het de Iiwohnerrot em Kreditbegehre für de Bau vom Regebecki «Kloster» zuegstimmt. S Areal, uf dem es erstellt wird, ghört em Kanton und uf de gliiche Grüenflächi het es nebem Kunstwerk vom Kulturwäg Limmig au en Fallschacht vom Abwasserverband vo de Region Bade Wettige. An den Schacht sell s Rägebecki vo de Iiwohnergmeind aagschlosse werde.
Für d Baugruebe müend im nordwestliche Teil vo de Grüenflächi d Ghölz groded werde. Je nach Witterig selled die Arbeite. wo öppe e Woche duured, am 7. Februar starte. Uf de Alberich Zwyssigstross wird es während de Rodigsarbeite immer wieder zu Verchersbehinderige cho. Es wird für die Ziit en Verchersdienscht ufbote, schriibd d Gmeind inere Mitteilig.
D Hauptarbeite started erscht in de zwöite Jahreshälfti und danach wird de Abwasserverband de Fallschacht saniere. D Bauarbeite sind so planed worde, dass d Bäum a de Stross und au s Kunstwerk ned tangiert werded. D Grüenflächi wird nach em Abschluss vo de Bauarbeite wider instandgstellt und es werded noii Ghölz aapflanzt.