Au d Post isch im Bahnhofquartier en Schritt witer

Dass s Bahnhofquartier in de nächschte Johr umgstaltet wird, isch scho sit Jahre bekannt. Nach de SBB und de Avadis Aalagestiftig hend au d Post und d AZ Invest ihres Projäkt präsentiert.
Sit vielne Johr isch d Umgstaltig vom Bahnhofquartier z Wettige es grosses Thema. Nach lange Verhandlige vo de Gmeind mit de Grundeigetümer und ere Teilzoneplanänderig chömmed di verschidnige Projäkt langsam aber sicher in d Umsetzigsphase. Bi de SBB, wo im März 2022 s Projäkt  «Gleislaube» präsentiert het und bi dem s Baubewilligungsverfahre laufd, isch d Fertigstellig im 2028 planed. D Avadis Aalagestiftig het s Projäkt  «Dynamo» im September vorgstellt. D Bauiigab isch in de nächschte Woche oder Mönet z erwarte.
Im Herbst 2024 hend au d Post und d AZ Invest ihres Projäkt präsentiert. Es isch vom Basler Architekturbüros HHF Architekte usgschaffed worde und nennt sich «Gartenstadt». Es sell 120 bis 130 Wohnige mit 1½ bis 4½ Zimmer umfasse. Au Gwerb- und Dienschtleischtigsflächene sind planed. Uszeichne duet sich s Projäkt durch vertikali Gärte , also ere Begrüenig vo Fassade, wie si im Iiwohnerrot scho einisch gfordered worde isch.

Quelle: https://bahnhofquartier-wettingen.ch/

Di ursprüngliche Eigetumsverhältnis hend sich in de Zwüscheziit verändered, au wenn es nach wie vor vier Grundeigetümer sind, wo am Bahnhofquartier beteiliged sind. Nebe de SBB und de Post, wo imme rnoch derbi sind, het d Firma Debrunner Acifer ihers Areal an d Avadis Aalgestiftig verchaufd und d Lägere Plastic an d AZ Invest, wo ihres Projäkt gmeinsam mit de Post entwickled het.