D Staatsanwaltschaft bitted d Insasse vo zwöi Fahrzüüg, sich z melde. Sie sind am 7. September 2024 churz nach de Vieri am Morge am Tatort vonerer Schussabgab vorbigfahre.
Über d Schüss, wo am frühe Morge a dem Septembertag z Ännetwettige gfalle sind, hend mir scho brichted. Jetzt suecht d Staatsanwaltschaft nach Züüge und zwar gezielt nach mindest zwöi Insasse vo PWs, wo zu de fragliche Ziit am Tatort vorbicho sind.
Es goht um d Insasse vomene silberfarbene Kombi, wo vom Schlossbärgtunnel her über d Schuelhuusplatzchrüzig Richitg Dättwil gfahre isch. Nach de Erkenntnis vo de Staatsaawaltschaft het de Fahrer vo dem Kombi de Tatbeteiligte müesse uswiche. Grad dehinter isch en schwarze SUV mit Fliessheck in di glich Richitg unterwägs gsi. D Insasse müend die beteiligte Manner während de Schussabgab am Tatort gseh ha, wil Videoufnahme zeiged, dass de Fahrzüüglenker het müesse churz bremse.
De Staatsaaawaltschaft isch es bisher ned glunge, die Insasse vo dene beide Personewage z identifiziere, die chönnd aber allefalls wichtigi Hiwiis geh uf das, wo am Tatort passiert isch. D Insasse vo de Fahrzüüg und witieri Persone, wo bi de Taat aawesend gsi si, selled sich bi de Oberstaatsaawaltschaft melde unter Telefon 062 835 46 75.
