D’Pfarrei St. Anton fieret ihres 70-Jahr-Jubiläum s’Johr über mit Konzärt, Chileruumfüehrige und spezielle Gottesdienschte. Am Samschtig, 15. Juni ladet sie d’Bevölkerig zum Patroziniumsfäscht rund um d’Chile St. Anton z’Wettige ii.
Am Namittag am zwoi träffed sich Chli und Gross zu Spiel und Spass, gnüssed d’Schwerelosigkeit uf em Bungee-Trampolin oder es Cornet vom Glacewagen. Z’Abig am sechsi lüted d’Glogge zum fierliche Gottesdienscht mit Gsang vom Antonius-Chor, Vocappella und de Minischtrante-Ufnahme und -Ehrig. S’Fest gaht – bi schönem Wetter auf em Chileplatz, suscht im Saal – bis i d’Nacht wiiter. Kulinarisch verwöhne tuet s’Antoniusteam, d’Missione Cattolica Italiana und d’Pizzeria San Antonio im Forum. En Feschtbar mit Fuessballecke betreued d’Jungwacht und de Blauring. Nach em Blasmusigkonzärt vo de Harmonie Wettinge-Chloschter und de Tamboure werd euse Landammann Markus Dieth de Gäscht mit ere Gruessbotschaft d’Ehr erwise. Ab am Viertelabachti ghört d’Bühne, wie vor 10 Johr, der insieme Musig-Bänd und allne Tanzfreudige, bevor d’Jubiläumsfiir gäg di elfi Z’Nacht mit emene Abig-Highlight usklinge werd.
S’Jahresmotto «Gmeinsam. Zuekunft. Gschtalte.» het au s’Logo inschpiriert, und bedütet «Verbundeheit, Umarmig, Liecht und Sunne».