Mit em noie Iiwohnerratspräsident startet s Wettiger Parlament in di zwöit Hälfti vo de Legislatur. Landverchauf und s Oberstufezentrum stönd im Fokus.
Elf Traktande muess de Iiwohnerrot hüt, Donnschtig, 25. Januar 2024 abhandle, bevor de Christian Oberholzer sini erschti Sitzig als Iiwohnerratspräsident cha beende. Die gröschte Welle het im Vorfäld de Tuusch vo Land gege e Wohnig usglöst, wo de Gmeindrat bim Iiwohnerrot beaatrait. Es Konsortium wot d Parzelle Nr. 2749 am Egge Rosenauwäg/Hardstross chaufe, was de Gmeindrat ned het welle, aber en Tuusch gege e Wohnig in de noie Überbauig wär für de Gmeindrot in Ordnig. D Fraktionsbricht vo de Partei lönd en interessanti Diskussion erwarte.
Um s meischte Gäld gohts bi de Frog vom Schuelruum. De Gmeindrot wot en Studieuftrag für de Bau vomene Oberstuefezentrum im Margi respektiv de Zirkuswiese durefüehre, was öppe 1’370’000.00 SFr wird choschte. Dezue chömmed Stellerhöchige bi Bau&Planig und i de Schuel, zum das Projäkt guet chönne z begleite und so Fehlplanige, wo vil tüürer chämted, z vermiede.