Hüt, Mittwoch, 18. Oktober 2023 isch di erscht Veraastaltig vo WorldWideWettige i dem Winterhalbjahr. Gäscht sind de Noël Ott, Aargauer Sportler vom Johr und für di kulturell Iistimmig de Jens Nielsen, Autor, Schauspieler und Sprecher.
De Start vo WorldWideWettige im 2021 isch guet gsi, aber numme churz, wil d Pandemie de Veraastalter en Strich durch d Rechnig gmachd het. Aber au de Noistart im Johr druf isch erfolgriich gsi und so gits au im Winterhalbjahr 2023/24 monatlichi Veraastaltige, bi dene gladeni Gäscht, wo do wohne oder gwohnt hend und en engi Vebrindig zu Wettige hend, vo dem verzälle, wo si begeistered.
De Aafang i dem Johr machd de Noël Ott, Aargauer Sportler vom Johr und Beachsoccer-Europameister im 2022. Ab de Sibni am Abe isch me im Schalander vo de LägereBräu willkomme.