D Margrit Wahrstätter, wo s Referendum gege de Entscheid vom Iiwohnerrot gege d Teilzoneplanänderig «Spezialzone Berg» ergriffe gha het, het am Mentig, 16. Oktober 2023 d Unterschrifte de Gmeind übergeh. Zämme mir Verträter vo de EVP, wo si debi unterstützt het, het si meh wi 1700 Unterschrifte chönne überreiche.
D Teilzoneplanänderig «Spezialzone Berg» bewegt d Wettigerinne und Wettiger. Das het me scho an de Läserbrief im Vorfäld vo de Iiwohnerrotssitzig am 7. September 2023 gmerkt, aber au an de Debatte im Rot und ned z letscht am chnappe Ergäbnis. Mit 23 Nei zu 22 Ja het de Rot di Teilzoneplanänderig abglehnt.
D Margrit Wahrstätter, Iiwohnerrötin vo de EVP und ehemaligi Co-Schuelleiteri vo de HPS, het danach s Referendum ergriffe und hetti bis zum 16. Oktober am Mittag öppe 650 Unterschrifte müesse im Rothuus abgeh. Gsi sind es dann mehg wi 1700, wo si de Gmeindschriiberi Sandra Thut het chönne übergeh. Jetzt muess d Gmeind d Unterschrifte prüefe und de Gmeindrat entscheide, wann d Abstimmig sell stattfinde. Danach chönnd di Wettiger Stimmberechtigte entscheide, ob de Therapiehof am Lägerehang sini Plän cha umsetze oder ned.