So e churzi Budgetsitzig het es im Iiwohnerrot scho länger nümm geh gha. Nach 3 Stund sind en Kreditaatrag für es Provisorium bim Schuelhuus Alteburg, de Finanzplan und s Buget 2024 berote und gnehmiget gsi.
D Diskussion um de Kreditaatrag für d Erwiterig vo de Schuel im Alteburg, wo scho jetzt us allne Näht platz, isch ned lang gange. Alli Fraktione hend sich einisch zu Wort gmeld und nach em Votum vom zueständig Gmeindrot, het de Rot de Aatrag gnehmiged.
De Finanzplan isch numme «zur Kenntnis» gsi und bim Budget sind diversi Aaträg vo SP/Wettigrüen und zwöi vo de SVP diskutiert und abgelehnt worde. Au d Finanzkommission het e paar wenigi Aaträg gstellt, wo alli aagnoh worde sind.
Zum Schluss het de Iiwohnerrot mit 46 Ja zu 2 Nei-Stimme «ja» zum Budget 2024 bi eme Stüürfuess vo witerhin 95% gsaid.