De Umzug vo de Chinderfasnacht het z Wettige Tradition. Am Samschtig, 18. Februar 2023 isch es wider so wit.
Corona het de Fasnächtler in de letschte Johr en Strich durch d Rächnig gmachd. I dem Johr isch em Chinderumzug dann fascht d Budgetablehnig zum Verhängnis worde, es isch dann aber d Ortsbürgergmeind iigschprunge. Do cha am Samschtig de Chinderumzug und de Chinderball im gwohnte Rahme stattfinde.
Ab de Eis am Mittag werded uf em Rothuusplatz d Nummere usegeh. De Start vom Umzug isch um Viirtelabzwöi und nach ere Stund dörfd de Umzug öppe vorbi si.
Ab em Viertelabdrü isch dann de Chinderball i de Turnhalle und um Halbiföifi isch d Rangverkündigung vo de Koschtüm mit de Priisverleihig.
Im und, je nach Wetter, vor em Fäschtzält cha me sich verpfläge und d Gugge spiled. Aakünd sind für Viertelabdrü d Bräusi-Vögel vo Schpreitebach, um Viertelvorvieri d Schwellbaumschränzer vo Windisch, um Viertelabvieri d Schnüffler Clique und um Viertelvorföifi d Räbeschläcker.