Bi de Iiwohenrratssitzig vom letschte Donnschtig het de Rat nach em Volks-Nei s Budget 2023 es zwöits Mol berate. Es esch jetzt parat zor Abstimmig vom 12. März 2023.
Eigentlich wär s überarbeitete Budget im Fokus gstande vo de Iwohnerrats-Sitzig vom 26. Januar 2023. Will de Thomas Benz zurgg trette esch, heds aber au Wahle brucht. Zerscht esch d Simona Nicodet vo de Mitti-CVP als Mitglied id FIKO gwählt worde. Im Aschluss hätti no en Präsident vo der Kommission sölle gwählt werde, bis dahin fast immer vo de Mitti-CVP bsetzt. I de aktuelle Finanzsituation wo i de Gmeind herrscht, esch das es schwiirigs Unterfange wie sech das a dem Obig usegstellt hed. Nach langem Hin und Her und einige Wortgfecht esch zwoimol de Leo Scherer zum Präsident gwählt worde, er het d Wahl aber jewils abgleht und esch au als Vizepräsident zruckträte. Am Schluss hets dann kein Präsident gha!
Im Normalfall nimmt de Präsident vo de Fiko au im Name vo de Kommission Stellig zum Budget und reicht au d Aaträg vo de FIKO im Rat ii. Das wär e Chürzig im Kulturbereich vo 24’000 Franke gsi, s Striiche vonere Stell uf de Bauverwaltig und als dritte Aatrag en Erhöchig vom Stürfuess um 1% uf 96%. Nacheme Sitzigsunterbruch – vorher hets wege de Wahle scho e paar geh – het dann de Adrian Knaupp für d Fiko e paar Wort zum Budget gsaid und die drü Aaträg begründet. De Iiwohnerrat esch aber em Gmeindrat gfolged und het alli drü Aaträg abglehnt. So esch es jetzt s vom Gmeindrat vorglegte Budget mit eme Stüürfuess vo 95%, wo de Stimmberechtigte am 12. März vorglegt wird.