Au im 2022 git’s kein Rebhüsli-Sonntig. En Alternative isch in Planig.
Uf em Wettiger Rebberg esch normalerwis e Woche vor de Schuel-Sommerferie de Räbhüüsli-Sonntig, wo sehr beliebt esch be de Bevölkerig. Aber die letschte zwoi Johr hed das us de bekannte Gründ ned chönne duregführt werde. Einigi händ sech jetzt drum uf’s Johr denach gfreut und ghofft, das Johr sech weder uf em Rebberg chönne z treffe zome gute Glas Wy und öppis feinem z Esse be de zahlriiche Räbhüüsli.
Leider chlappeds i dem Johr ned, de Räbhüüsli-Sonntig uf d Bei z stelle. Es hed Idee gäh, s Fäscht erst gege de Herbst, a Samschtig und Sonntig z mache, aber die Idee esch nume grad vo öppe 10 interessierte Räbhüüsli ufgno worde. So wird au das Johr kein Räbhüüsli-Sonntig am Rebberg stattfinde.
Entüschti Rebbuure händ jetzt jedoch e Alternative planed. Am Samschtig und Sonntig de 25./26. Juni findet vor oder i de Tiger-Bar am Casinoweg in Wettige es Wyfäscht statt. Detail send be de Tiger-Bar z erfahre.
Au geds Idee vo einzelne Rebhüüsli, a sebem Sonntig gliich z öffne und im chline Rahme de Rebhüüsli-Sonntig z dureführe.