Am 20. April 2022 zügled s St. Bernhard vom Lägerehang ins Langäckerquartier. Geschter het d Bevölkerig s noie Alterszentrum chönne goh aaluege.
D Schlage isch lang gsi, churz nach de Elfi am Sonntig, 10. April 2022, wo me de Noibau vom St. Bernhard im Langäcker het chönne goh aaluege. Am Iigang hend alli Bsuecher e Maske übcho und hend dann alles Wichtige chönne gseh: D Chuchi, d Wäscherei, de Ruum vo de Stilli und natürlich d Statione mit de Pflägzimmer und au d Wohnige. Mit viel Holz, helle Farbe und eme us oisere Sicht au architektonisch glungene Iigangsberiich, het de 70-Millione-Bau e schöne Usstrahlig. Gueti Voraussetzung, dass sich d Bewohnende dete werde wohlfühle.