Sit em 2020 het de Kapelleverein kei GV meh chönne abhalte. Jetzt sind staatutegrächt zwöi Johr uf einisch abgeschlosse worde.
Nach dem die letschte vo de 25 anwesende Mitgleder Platz gno händ, hed de Markus Brunner als Präsident die GV chönne eröffne im groose Saal im Pfarreiheim St. Sebastian. Grad zu Beginn vo de GV esch mit em Markus Heil zäme s «Ubi Caritas» in Gedenke ad Helena Knuser gsunge worde.
Die Anwesende hend gspannt de usfüehrige vom Präsident gfolged, wo vo de vergangene Vereinsjohr brechtet hed. Au d Kassebrecht, Budgetplän und s Jahresprogramm sind vorgstellt worde.
De Verein spendet i jedem Johr d Inahme vom Cherzeverchauf i de Kapellene, jewils für gueti Zweck. So wird das Johr en Bitrag vo 2500 Franke ad www.stiftung-kifa.ch in Zofinge gspendet, 1000 Franke für de Ruum vo de Stilli im St. Bernhard und 1000 Franke für es Projekt wo Rückreisendi in Irak, bem Wederufbau unterstützt. Nach guet ere Stond hed de Markus Brunner die GV mit Dank a all Mitwirkende chönne schlüsse und de gmütlich Teil hed chönne starte.