De Momänt wo sie vorem Schwiizer Pavillon in Dubai händ chöne Ihres «Könne» zeige, werded d Wettinger Tamboure niemeh vergesse. Die 11 Mitglieder vode Tambourevereinigung Wettige und Umgebig (TVWU) händ d Ehr gha, ade Expo 2020 in Dubai es Stückli Schwiizer Kultur zpräsentiere. Dört händs sogar no e Iladig übercho in Pavillon vo Thailand sowie vo Saudi-Arabie. Jetzt sind Tamboure wieder zrugg im Aargau und zehred vo einzigartige Idrück.
Wochelang händ d Tamboure sich uf ihri grossi Reis nach Dubai vorbereitet. Unzähligi Kontakt händ müesse knüpft und Details abklärt werde. Am 5. Februar isches denn endlich so wiit gsi. Zäme mit 27 Begleitpersone – die wie auch Tamboure Ihri Reis selber finanziert händ – si mit em Flugzüg gege Mitternacht z Dubai glanded. Det hät Tambourevereinigung Wettige und Umgebig nämlich die grossi Ehre gha, ade Expo 2020 im Schwiizer Pavillon ufzträte. Die isch ufgrund Corona nämlich es Jahr verschobe worde und duured no bis am 31. März 2022. Nacheme Ruhetag hät denn di ganz Reisegruppe de Schwiizer Pavillon bsuecht und hät die kulturelle Wert und progressive Idee uf sich würke lah, welli det euses Land präsentiert hät. Am gliche Tag hät TVWU drü Uftritt wahrgnoh. E bsundrigi Ehr isch natürlich au de Empfang vom Millionste Bsuecher im Schwiizer Pavillon gsi. Nebe de musikalische Isätz sind au Ausflüg i di extravaganti Stadt, zwisched em türkisfarbige Meer und de gheimnissvolle Wüeschti ufem Programm gstande. Stadtrundfahrt mit eme Fotostopp bim Burj Al Arab, id Altstadt vo Dubai, Überquerig vom Dubai Creek miteme Wassertaxi, Gwürz und Gold Souk und natürlich e rasanti Fahrt über Düne vor de Tor Dubais sind Erlebnis wo mer so schnell ned vergisst.
D Uftritt vode TVWU händ sich schnell umegsproche und so händs denn e Iladig vom Thailand Pavillon übercho, wo innert churzer Zyt schnell probt und denn e länderübergriffendi Performance ufgfüehrt worde isch. E wunderbari und wertvolli Erfahrig. Höch erfreut sind denn TVWU-ler gsi, wo de Manuel Salchli (Direktor vom Schwiizer Pavillon) bime öffentliche Apéro verkündet hät, dass au Saudi-Arabien agfraged hät füren Uftritt. Es witers Highlight uf einere vode grösste Bühni dörfe ufzträtte wo id Vereinschronik wird igah.
Als Abschluss vo dere wunderschöne, strenge und idrucksvolle Wuche häts e Schiffahrt geh mit Nachtesse und Dubai by night. Am 12. Februar sind denn alli TVWU-ler inkl de Begleitpersone wieder gsund und vorallem happy id Schwiiz retour cho. TVWU hät als chlinste Verein vo Wettige dörfe anere Weltusstellig euses Land repräsentiere, fremdi Kulture und Mensche kennelerne. Das alles wär ned möglich gsi ohni Gönner, Sponsore und Unternehmer wo eus unterstützt händ. Mer sind dadefür vo Herze dankbar, denn das isch i de hütige Zyt ned selbstverständlich!! DANKE !
Die nächst Reis isch scho in Planig (Soldatenwallfahrt mit em Schwiizermilitär nach Lourdes) und mer hoffed, dass sich au no s einte oder andere Aktivmitglied finde tuet. Mer sind offe für neui Mitglieder öb Afänger oder scho usbildet, öb Chind oder Erwachsnigi. Händ Muet, meldet euch bi eus und chömed mit uf witeri hoffentlich schöni musikalischi Usflüg. Witeri Infos under www.tvwu.ch Mer freued eus uf Euch !!
Fabienne Speckert (Präsidentin)