Für Sonntig, 27. Februar 2022 hend e Markus Heil und de Lutz Fischer-Lamprecht zum Friedengebet in d Kapelle vo de Antonius-Chile iiglade gah. D Kapelle isch fascht voll gsi.
D Betroffeheit über de Chrieg in de Ukraine isch höch. Überall wo Verasstaltige stattfinde, sigeds Friedensgebet oder Demonstratione, chömmed dütlich meh Lüt, wie d Veraastalter erwartet hend. Das isch geschter bi dem Demo in Ännetwettige eso gsi, aber au bim Friedensgebet im St. Anton. D Kapelle isch fascht voll gsi, wo de Lutz Fischer-Lamprecht und de Markus Heil au ihre persönliche Bezug zu de Ukraine erlütered hend. De reformiert Pfarrer, wo sini beide Grossvätere nie het chönne kennelehre, het vo sinere Suechi nach Spure vo ihne verzällt, wo er in de Ukraine Lüt dörfe kennelehre, wo ihn fescht unterstützt hend. Au en Onkel vom Markus Heil het in de Ukraine sini letschti Ruhe gfunde, wo er im Oktober 1943 dete gfalle isch.
Au vo de Ohnmacht hend di beide gred, vo Gwaltphantasie, Schuld und Angst. Alli Teilnehmende hend nach ere Stille e Cherze chönne aazünde und so ihre Betroffeheit chönne usdrücke. Im Rahme vom Gebet isch dezue ufgruefe worde, als Zeiche vom Protest gege de Chrieg an di Russich Botschaft z Bärn Sonnebluemesame z schicke, wil d Sonneblueme es Symbol für d Ukraine isch. Wer sich dem Protest wot aaschlüsse cha eifach es Couvert neh, e paar Same dritue, s Couvert frankiere und an folgendi Adresse schicke:
Botschaft der Russischen Föderation, Brunnadernstrasse 53, 3006 Bern