Wie brechtet, hed geschter, 5. Januar 2022 s Kino Elite für immer gschlosse. Gegenüber em Badener Tagblatt spart d Alexandra Sterk ned mit Kritik a de Behörde. De Gmeindrat hed jetzt Stellig gnoh.
D Vorwürf, wo d Betrieber vom Kino Sterk gegenüber im Badener Tagblatt üssered, wieged schwer: Vo Behördesite siged de Firma Sterk Cine AG immer weder Stei in de Wäg glegd worde, heissts da und me hed s Projekt ständig müesse aapasse. «Zuletzt hätted mir wege noie Uflage die noie Kinosääl so chli baue müesse, dass es sich für eus chum meh glohnt hätti», so wird d Alexandra Sterk zitiert. Wer sie mit de Behörde meint, d Gmeind oder de Kanton, bliibt offe.
De Gmeindrat het e Mediemitteilig zu de Vorwürf veröffentlicht und macht transparent, was sit em 2012 an Abklärige fürs Areal vom Kino und em Winkelried troffe worde esch.
S erschti esch e Machbarkeitsstudie gsi, wo d Grundeigetümer händ loh erstelle. Die Studie het verschidnigi Variante ufzeiged, wie be de geplante Überbauig Winkelried e Senioreresidenz, en unterirdische Kinokomplex mit vier Sää, es Restaurant und Wohnige chönnted baut werde. Wil s Vorhabe komplex gsi esch, esch mit Zuestimmig vo de Grundeigetümer im 2014 es Gstaltigsplanverfahre für s Gebiet zwüsche Staffel- und Winkelriedstrass gstarted worde. S Verfahre esch dann im 2015 vorläufig sistiert worde, wil d Teiländerig vo de Nutzigsplanig Landstrass im Gang gsi esch, wo für d Bauherrschaft dütlichi Vorteil brochd hed. Ändi Oktober 2017 händ d Grundeigetümer dann de Gmeind mitteild, dass sie ufs Gsaltigsplanverfahre verzichted, wil d Planigssicherheit z gering und Uflage vom Kanton z höch siged. De Gmeindrat esch überrascht und irritiert gsi vom Aatrag uf d Iistellig vom Verfahre, au wil d Gmeind grossi personelli und finanzielli Ressource ins Verfahre gsteckt hed gha. Sit dem Rückzug hed d Bauherrschaft sich nümm bi de Gmeind gmeldet, zum das Projäkt witterzentwickle, während d Gmeind transparent über geltendi Vorschrifte und Möglichkeite für e gueti Entwicklig vom Planigsperimeter informiert hetti, wi d Gmeind schribd. De Gmeindrat beduured, dass mit de Schlüssig vom Kino en Teil Läbensqualität verlore goht.