D Mitteilig, wo d Firma Sterk Cine AG u.a. uf ihre Website postet het, isch en Schlag für Wettige. S Kino a de Landstrass isch ab em 5. Januar 2022 gschlosse.
Im 1947 het d Familie Sterk a de Landstrass s Kino Elite eröffnet. Im 1997 isch es in es Triplex umbaut und im 2007 no einisch sanft renoviert worde. Im 2011 het s Familieunternehme dann d Projektion vollständig digitalisiert. Trotz dene Investitione, isch jetzt Schluss und es schint, wie wenn es mit de Überbauig vom Areal vom Kino und em Winkelried lagsam würd Ernst gelte.
D Planige, wo sit 10 Jahr laufed, zum en noie Kinokomplex mit Wohnige und Gwerb z realisiere, sind jedefalls iigstellt worde. D Firma Sterk Cine AG wird sich uf ihri beide Standört z Bade konzentriere.