Di erschte 2 Johr vo de WyStärn AG sind schwirig gsi

De Gmeindrot het mit em WyStärn am Geburi aagstosse

Am 21. August 2019 sind 16 Winzer und 333 Aktionär zämme cho zum d WyStärn AG gründe. De Gschäftsführer het genau zwöi Johr spöter Uskunft geh zu de aktuelle Situation.

Mit viel Elan isch d WyStärn AG in s erscht Gschäftsjohr gstarted. D Truube hend bi de Wümmet 2019 e gueti Qualität gha und es isch am noie Uftritt gschaffed worde, zum parat si, wenn de 2019er Wy cha verchaufd werde. Aber dann isch Corona cho: kei Degustatione, kei Fäscht, gschlosseni Restaurant. Da isch es schwer gnueg Wy z verchaufe und bi ere userordentliche GV hend d Aktionär e Kapitalerhöchig bschlosse, damit gnueg Liquidität umme isch. I de Zwüscheziit isch si erfolgriich abgschlosse.

De WyStärn het uf d Problem bim Absatz mit Innovatione reagiert. Wils me de Wy niened het chönne degustiere, het me es Degustationssett zämmegstellt und mit Pink Moon und em Ferdinand sind ganz noii Produkt uf de Märt cho.

E witeri Useforderig i dem Johr sind d Truube. S nassi Wetter, wo au d Verbreitig vom falsche Mehltau befördered het und anderi Wetterereignis hend bi manche Parzelle zu eme Totalusfall vo de Truubeernt gfüehrt. An andere hets no 10-20%, so dass es en Totalusfall bim Rotwy wird geh. Numme einzelni Rebbuure hend meh oder weniger zuefällig bim Sprütze s richtig Ziitfaischter verwütscht.

D WyStärn AG started trotzdem optimistisch ins dritti Johr.