Am Sunntig isch «Play for Charity»

Stadion ALteburg

Am Sunntig, 22. August 2021 finded im Stadion Alteburg «Play for Charity» statt. S Ziel isch, möglichscht vil Gäld für en guete Zweck z sammle.
Viel Prominenz tschutet am Sunntig für en guete Zweck. Fuesball-Legende und Stargäst chömmed zum de Verein «Play for Charity» z unterstütze, wo mit em Gwünn verschidnigi Stiftige wot unterstütze. Z Wettige werded u. a. de
Divertimento-Comedian Jonny Fischer, de Carlos Valderrama, de André Santos und d Inka Grings erwarted. AU de Ike Shorunmu und de Shabani Nonda werded debi si und sogar de brasilianisch Fuessballer Ronaldo het aakünd, er chämti. Au Schwiizer Fuesballer selled morn im Stadion uftauche: de Marco Streller, de Stefan Lichtsteiner, de Diego Benaglio, de Johan Vonlanthen und anderi werded erwartet.

D Iinahme vom Aalass gönd bispielswis an d Schwiizer Stiftig vergewaltigt.ch, d Kinderspitex Horn und d Stiftig Kinderheim Baphumelele. De erschti «Play for Charity»-Aalass isch im August 2020 im Letzigrund z Züri gsi. Danach het de Remo Schmid im November 2020 de Verein «Play for Charity» gründ und isch au hüt no de Präsident vom Verein. S Ziel vom Verein isch es, sich gege sexuelli Gewalt, für Chind in Not und im Tierschutz z engagiere und bieme jährliche Fuessballevent für di entsprechende Stiftige Gäld z sammle. Ei grossi Spend gits scho. D Lüt vo BEATY LEVEL Intercoiffur wend 10’000.- Franke spende.