D Nagra het au unter de «südliche Lägere» Opalinuston entdeckt. Wettige gwünnt dodemit d Usmarchig ums Ändlager gege d «nördlichi Lägere» und de «Bözberg».
D Suechi nacheme Ändlager für de Atommüll, wo di in Wettige asässigi Nagra scho sit Johrzehnt beschäftiged, het en unerwarteti Wendig gnoh. Nach de Exploratione a de Lägere und uf em Bözberg het sich di «Nationali Gnosseschaft für d Lagerig vo radioaktive Abfäll» für de Standort «südlichi Lägere» entschide. D «Oberflächeinfrastruktur» wird in de obere Geisswies realisiert, de Lugibachstrass nache.
D Begeisterig für di Plän sind bi de Mediekonferenz bim Nagra-Chef und em Gmeindamme z gschpüre gsi. De Thomas E., Gschäftsleiter vo de Nagra, het vo de Nöchi zu de Autobahn und dodemit vo de guete Verkehrsabindig gschwärmt. Zudem isch me am Abkläre, ob me vom Tägerhard her es Gleis bis in di Oberi Geisswies chönd verlege oder durch en Abzweig vo de Limmattalbahn en Bahnzuegang chönnd gwährleischte. «En witere Pluspunkt, wo für Wettige spricht», so de Thomas E., sig di Schicht Opalinuston, wo me 800 Meter unter em Chütt gfunde het. Der gilt als optimal, für d Lagerig vo so gefährliche Stoff, wo vili Jahrtuusig werded strahle. Ned weniger enthusiastisch isch de Gmeindamme Roland K. Er het bi de Mediekonferenz sini engi Bezihige zu de Nagra betont, bi dere er früehner emol gschaffed het. Zudem het er usgführt, dass d Stüüriinahme, wo s Ändlager wird generiere, d Gmeindfinanze uf Johrzehnt, we ned Johrhundert, werded sichere: «Ich bin überzügd, dass Wettige mit dem Deal e strahlendi Zuekunft vor sich het», so de Gmeindamme wörtlich.