Oisi Jury het entschide. S Wettiger Wort vom Johr 2020 isch … ned «Corona», sondern öppis anders.
Zum zwöite Mol hend d Wettiger Nochrichte es «Wort vom Johr» lancierd. Entschide hend i dem Johr ned d Läserine und Läser, wi im letschte Johr. Mir hend d Jury, wo im letschte Johr d «Reschtchoschtefinanzierig» und «Ännetwettige» für d Abstimmig usgläse hend, direkt s Wort bestimme loh, wil mir mit em Fotiwettbewerb, bi dem oisi Läserinne und Läser zwüsche drü Föteli werde usläse chönne, scho öppis zur Abstimmig stelle werded.
Usgwählt het oisi Jury de «Minichreisel». Er stoht stellverträtend für d Problem vo de Wettiger Politk, wo es ned numme bim Minichreisel, sondern au bi de Budgetabstimmig 2020 ned schaffd, de Bevölkerig d Gschäft so z präsentiere, dass si verstande und akzepierd werde. Er stoht aber au für s Umsichgrife voneme Populismus, wo behaupted en Minichreisel würdi 1.8 Millione Franke choschte, was aber de Betrag für de Aateil vo de Gmeind für die ganze Werkleitigs- und Strossesanierig vom Chreisel bgi de Chrüzig Lägere-/Etzel-/Säntisstross bis zu de Bernina-, Eiger- und widerum Lägerestross isch.