S Jubiläumsjohr zu 975 Johr Wettige god langsam aber sicher em Ändi entgege und es esch ganz anderscht gsi, wie planed. Hend ihr Föteli us dem Johr, wo für euch gliichwohl en Bezug zum Jubiläum hend?
D Erinnerige as «Atmosphäre»-Fäscht hätted sich tüüf is Gedächtnis iigrabe, wenn es stattgfunde hätti. Au d Perleschnuer, wo d Gmeind lanciert gha het, isch wege Corona und em fehlende Budget in de «Chinderschueh» stecke blibe. Gliichwohl geds Reminiszenze a das Jubiläumsjohr, sigs das 100-jährige vo de reformierte Chilegmeind, 125 Johr St. Sebastian, de neui Chreiselschmuck bim Rothuus, d Schlussfahrt vom Atmosphäre-Bus oder s neue Buech «975 Zeilen». Denebe hend ihr aber velecht au en ganz eigede Bezug zu Wettige und zum Jubiläumsjohr. Mer sueched Föteli, wo mit em Jubiläumsjohr zämmehanged.
Z Gwünne geds es Exemplar vom Jubiläumsbuche «975 Zeilen»!
Teilnahmebedingige:
– Föteli müend per Mail an wettiger.nochrichte(at)gmail.com gschickt werde mit Betreff: 975
– Foti muess im Johr 2020 z Wettige fotografiert worde sii oder en klare Bezug zum Jubiläum ha
– d Föteli dörfed zuegschnitte si, d Uflösig muess aber no guet gnueg si, dass d Qualität usreichd, um sie uf A 5 chönnd uszdrucke
– Collage sind ned erwünscht
– d Urheberrecht bliibed bim Fotograf/de Fotografin, si gebed aber de Wettiger Nochrichte d Erlaubnis, d Föteli online z verwende und au für schriftlichi Veröffentlichunge wie Broschüre oder Buecher (im Print würd de Fotograf/d Fotografin) uf jede Fall aageh
– jede dörf bis zu 5 Föteli iireiche
– über de Wettbewerb wird kei Korrespondenz gführt
– de Rächtswäg isch usgschlosse
– mit em Iireiche vo Föteli anerkenned d Teilnehmendi d Wettbewerbsbedingige