Weder esch es so witt … Au im 2020 werded trotz «C» a diverse Ort Christbäum verchauft.
Tratitionell esch KAB uf em Rathuusplatz be de grosse Tanne aztreffe. Det send Nordmanntanne, Blautanne und au die klassischi Rottanne im Angebot. D Bäum chömmed all us de nöchere Region, send also ned med Lastwage, eng a eng zämebunde vo witt-wegg uf Wettige brocht worde.
De Erlös vo dene verchaufte Bäum god je zueme en Drittel ad Arwo, ad Mission Brücke – le Pont und anderi.
Göffnet isch de Verchauf vom 12. bis und mit 24. Dezember 2020 (24.12 bis ca. 10Uhr), Mändig bis Fritig 9.00-12.00 Uhr + 13.30-18.30 Uhr, am Samschtig 8.30-17.00 Uhr.
En wittere Christbaum-Verchauf esch de von de Famile Benz uf em Ziegelhof a de Landstross 227.
Das mol esch es en Drive-In Verchauf !
De findet das Johr am Samschtig 12. Dezember statt, zwüsche 10 Uhr und 18 Uhr. Christbäum send natürlich ab sofort scho erhältlich uf em Ziegelhof!
Nebe dene zwoine Ort gets natürlich au Möglichkeite uf em Lüscherhof a de Unter Geisswiesstross direkt ab Hoflade go Christbäum go chaufe.
I dem Johr verchauft au de Peter Steimer, a de Fohrhölzlistrasse (uf de andere Sitte vo de Bahngleis, bem Gartebad), sini eige-ufzogne Christbäum vom Feld weg, am 19. Dezember, vo Nün bis Zwölf (9-12).
Witeri Verchäuf gits a de Schartestross nebem Pfarreiheim St. Sebastian, au direkt vom Hof, be de Migros a de Landstross, bem Coop im Tägipark, uf em Zentrumsplatz, und und und…..
uf jede Fall veel Vergnüge bem Ussueche vom schönste Christbaum.