Wi immer isch z Wettige tiffig uszählt worde. Uf di kantonale und nationale Schlussresultat müend mir aber no warte.
Bi de hütige Abstimmig isch es um 5 eidgnössischi und 2-3 (je nach dem, ob me di beide Abstimmige zu de Schuelpfläg als eini verstoht oder ned) kantonali Vorlage gange. Di nationale Vorlage hend all e Stimmbeteiligung vo meh wi 60% gha, di kantonale e chli e tüüferi.
Konkret säged d Wettigerinne und Wettiger Nei zur Begrenzigsinitiative und zwar mit dütliche 67.44% (5’145 Stimme) gege 32.56% Ja (2’484). Au s Jagdgsetz isch abglehnt worde, wenn au mit 54.57% Nei (4’101) ned ganz eso dütlich. De Ja-Aateil ligd bi 45.43% (3’414). Au dütlich abglehnt hend d Wettiger Stimmbürger s Gsetz zu de stüürliche Berücksichtigung vo de Chinderbetroiigschoschte. 66.63% hend Nei gsaid (5’005) und 33.37% Ja (2’507).
E Ja-Mehrheit hets für de Vaterschaftsurlaub geh (60.86%/4’608 Stimme). D Vorlag isch vo 2’964 Lüt (39.14%) abglehnt worde. E chnappi Zuestimmig gits au fpr d Beschaffig vo de Kampfflugzüüg mit 3’853 Ja (50.85%) zu 3’724 Nei (49.15%).
Bi de Abstimmig über d Abschaffig vo de Schuelpfläg het d Verfassigsänderig e Zuestimmig vo 64.64% (4’403 Stimme) übecho, 35.36% (2’409) sind degege gsi. Bi de Abstimmig über d Aapassig vom Schuelgsetz hend numme 62.93% (4’328) Ja gsaid und 37.07% (2’549) Nei. Ebefalls aagnoh worde isch s Energiegsetz mit 57.22% (4’019) Ja gege 42.78% (3’005) Nei.
Di kantonale und eidgnössische Ergäbnis liged no ned vor. Bsunders bi de Kampfflugzüg un dem Energiegsetz schint s Renne no offe z si. (Stand 15.12 Uhr)