Sit 30 Johr füehrt de Walter Erni de Gasthof Sterne. Sit mindescht 764 Johr werded dete Gäscht empfange.
Wil de Gasthof Sterne mit em Walter Erni mit sinere Frau Andrea und em Team au Gastgeber für de Rotaryclub Wettige-Heitersberg isch, het de Serviceclub zum 30-jährige Glückwünsche überbröchd. S Jubiläum falld wege de Coronakrise in e schwirigi Ziit fürs Gastgwerb. Au us dem Grund isch de Rotaryclub erlichtered, dass er wider wöchentlich zum Lunch in de Sterne cha cho. Aalässlich vomene settige Lunch het de Präsident Flavio De Nando em Gastgeberpaar Andrea und Walter Erni d Gratulatione vom Club und Blueme und es Gschenk für s Sterne-Team überreichd.
De «Sterne» isch im 1256i zum erscht Mol erwähnt worde, so dass dete sit meh wi 764 Jahr Gäscht empfange werded. Wo d Zisterziensermönche vo Salem am Bodesee im 1227i s Chloschter Wettige gründ hend, hend si glichzitig es Huus für Gäscht baued, au damit Aaghörigi vo de Mönch uf Bsuech chönd cho. (FdN)