D Limmattalbahn fahrt scho bis Schliere und de Abschnitt bis Killwange esch im Bau. Ob sie bis uf Bade sell verlängered werde, da drüber gönd d Meinige usenand. Mir händ d Grossrät gfröged, wi si morn werded stimme.
Am Tsischtig, 8. September 2020 taged de Grossi Rat i de Umwältarena z Spreitebach. Eis vo de Traktande beschäftiged sech mit de Limmattalbahn. Ihres Trassee sell im kantonale Richtplan iitraid werde, damit d Flächene, wo s Tram einisch würd bruuche, parat währed. De Regierigsrat goht nämli devo us, dass s Limmattal sini Dynamik wird bibhalte und erwartetd us dem Grund es Wachstum bi de Arbeitsplätz und de Bevölkerig vo je 30% bis ins Jahr 2040. Wil de Vercher aber scho jetzt, zumindest in de Stossziite, am Aaschlag esch, bruchds dringen zuekunftfähigi Lösige.
Mer händ die sebe Wettiger Grossrät aagfröged, wie sie das mit de Limmattalbahn (LTB) gsend:
De Wettiger Gmeindamme Roland Kuster (CVP) esch en klare Befürworter vom Tram. Er betond, dass s Limmattalbahn in Zuekunft im Vercher werd ersticke, wenn mer s Tram ned würd baue. Dodemit würd die Region ihri gueti Erreichbarkeit ufs Spiel setze. Zudem hätti d LTB en positive Effekt für d Umwält und s Klima, würd die dringend notwendig Verlagerig uf de ÖV möglich mache und d Wohnort und d Arbeitsplätz im Limmattal mitenand verbinde, so de Kuster.
De Lutz Fischer-Lamprecht (EVP) gseht es ähnlich. Er hoffd aber, dass die Vorussage vomene Wachstum vo 30% vo de Bevölkerig z höch sind. «Scho i de 1960er-Johr esch s Wachstum ned eso höch gsi, wie mes erwartet het». Falls die Wachstumsprognose aber iitrifft, dann müessts Limmattal parat si fürs Tram. D Transportkapazitäte siged öppe doppelt so höch wi bi de Glenkbüs und er betond, dass de Iitrag d Vorussetzige schaffd, s Tram baue z chönne, es aber no lang kein Entscheid defür esch, dass d LTB tatsächlich baued wird.
D Antoinette Eckert (FDP), d Michaela Huser, de Daniel Notter (beidi SVP), d Lea Schmidmeister und de Alain Burger (beidi SP) hend uf eusi Aafrog no ned reagiert. Mir werded die Antwort ergänze, wenn sie eus vorliged.