Scho im März het de Präsident vo de Schuelpfläg, de Thomas Sigrist, sin Rücktritt bekannt geh. Zitgliich isch au de Marcel Aebi (CVP) zruckträte. Obs en Ersatzwahl git, isch no offe.
Au mir hend de Rücktritt vom Thomas Siegrist (parteilos) gmelded gha, danach isch es aber lang ruhig gsi, bsunders im Blick uf d Ersatzwahl. De Doppel-Rücktritt, wo uf de 31. Juli 2020 het selle erfolge, isch vo de Gmeindabteilig vom Departement Volkswirtschaft und Inneres vom Kanton erscht uf de 29. November 2020 gnehmiged worde, wi d Gmeind scho aafangs Juli mitteild het.
De Grund isch, dass d Stimmbevölkerig am 27. September 2020 wird entscheide – de ursprünglich Abstimmigsterm vom 17. Mai isch wege de Corona-Krise verschobe worde – ob d Schuelpfläg ufs Ändi vo de jetzige Amtsperiode abgschaffd wird. Wird s’ Volk für en Abschaffig stimme, dann cha uf en Ersatzwahl verzichted werde. Das het de Kanton erlaubd, wil es ned sinnvoll isch, für numme 13 Mönet zwöi noii Lüt in d Schuelpfläg z wähle. Wenn s Volk aber Nei be dere Abstimmig über d Abschaffig vo de Schuelpfäg, dann würdi am 29. November 2020 d Ersatzwahl stattfinde. Intressierti chönnted sech dann bis am 16.Oktober melde.