Zu de Spitzesportler us Wettige zähled au d AFM Futsal Maniacs. Am Samschtig, 15. Februar 2020 träffed de erscht und de zwöitplatziert im Tägi ufenand.
De Match verspricht spannig bis zum Schluss, was es im Futsal no hüüfig git. Bi dere vo de FIFA anerkannte Variante vom Hallefuessball wird ohni Bande gschpild. Technisch versiert müend d Spiler si, schell vo Aagriff uf Verteidigung umschalte und au umgekehrt. Sit vilne Johr sind d Futsal Maniacs i dere Sportart ganz vore mit derbi und sind i de Saison 2015/16 Schwiizer Meischter gsi.
I de aktuelle Saison sind d Maniacs au erfolgriich debi und sind bis zum Unentschide am Fritig z Bulle erschte i de Tabelle gsi. Aktuell sind si punktgliich mit em Leader Futsal Minerva, gege di am Samschtig, 15. Februar 2020 um Föifi am Namittag im Tägi s Spitzespil stattfind. D Maniacs, wo als Ableger vom FC Wettige entstande sind, würded sich über vili Zueschauerinne und Zueschauer froie.