Am 6. Januar 1920 het de Grossi Rot vom Kanton Aargau per Dekret d Chilegmeind Wettige-Noiehof gründ. Am 5. Januar 2020 wird das gfiired.
Nach de Niderlag vo de Reformierte im zwöite Kapellerchrieg im 1531 het es z Noiehof und z Wettige über 3 Johrhundert kei Reformierti meh geh. Erscht mit de Eröffnig vom Lehrerseminar i de Gebäud vom Chloschter Wettige und de Induschtrialisierig sind Reformierti uf Wettige und Noiehof cho. Si hend sich zunere Chilegnosseschaft zämme gschlosse, wil di reformiert Chilegmeind Bade für en Bitritt z vil Gäld het welle. Betroit worde sind di Gläubige entweder vom Religionslehrer vom Seminar oder vom Würeloser Pfarrer.
Gross isch d Froid und d Ufbruchsstimmig gsi, wo mit em Dekret vom Grosse Rot en eigedi Chilegmeind gschaffe worde isch. S dodemit verbundeni Rächt uf e Pfarrwahl isch no im selbe Johr wahrgnoh worde.
Di noi Chilegmeind isch über vili Johrzehnt gwachse und gwachse, sit de 1970er Johr goht d Zahl vo de Mitglider ehnder retour. D Chilegmeind isch gliichwohl wider in Ufbruchsstimmig und wird en Tag vor em tatsächliche hundertschte Geburi en Fäschtgottesdienst fiire, passend zum Thememonet „Aufbruch“ vo de Fiirlichkeite zu 975 Johr Wettige. Am 5. Januar 2020 um Halbizähni am Morge gohts i de reformierte Chile a de Etzelstross z Wettige los. D Gottesdienschtbsuecherinne und – bsuecher sind aaschlüssend zueme Apéro riche iiglade.